Actualidade

A cita terá lugar o luns 16 de xuño no Hotel Puerta del Camino e reunirá entidades representativas do sector, que suma en Galicia máis de 7.000 organizacións e 20.000 postos de traballo.

O Foro pola Economía Social Galega (FOROESGAL) organiza o luns 16 de xuño o acto central conmemorativo do Día da Economía Social Galega, unha xornada que terá lugar no Hotel Puerta del Camino de Santiago de Compostela a partir das 12:00 horas.

A economía social representa un sector estratéxico en Galicia, integrado por cooperativas, sociedades laborais, centros especiais de emprego, empresas de inserción e outras fórmulas que combinan actividade económica con interese social. Actualmente, este modelo empresarial conta con máis de 7.000 entidades activas na comunidade e xera preto de 20.000 empregos directos, con impacto relevante en áreas como a agricultura, industria agroalimentaria, servizos sociais, inclusión laboral de persoas con discapacidade, comercio e educación.

FOROESGAL é o espazo común de representación de todas estas organizacións, e traballa pola súa visibilidade, fortalecemento e interlocución coas administracións públicas e coa sociedade.

Programa do acto

• 12:00 h — Café de benvida

• 12:30 h — Inauguración institucional a cargo de Pedro Blanco, delegado do Goberno en Galicia

• 12:45 h — Benvida do presidente de FOROESGAL, Mino Martínez

• 13:00 h — Mesa redonda “O camiño do FOROESGAL: mirada dende a orixe”, coa participación de fundadores e representantes das entidades AESGAL, AEIGA, AGACA, CEGASAL e ESPAZOCOOP

• 14:00 h — Clausura institucional a cargo de José González, conselleiro de Emprego, Comercio e Emigración

• 14:15 h — Cóctel - networking