Fran Perea regresa ao Recorda Fest como décimo artista confirmado
Fran Perea, un dos artistas máis aclamados da pasada edición do Recorda Fest, volve este verán a A Coruña para repetir experiencia na terceira edición do festival, que terá lugar no Muelle de Batería. A súa confirmación súmase ás xa anunciadas de Lori Meyers, Xoel López, Nena Daconte, Ultraligera, Despistaos, Álvaro de Luna, Efecto Pasillo, Leire Martínez e Griso, facendo de Perea o décimo artista confirmado no cartel deste ano.
“Estamos moi felices de que vaia volver soar en directo o ‘1+1 son 7’; foi un auténtico momentazo na tarde do sábado da nosa segunda edición”, asegura Olga Lamas, directora do Recorda Fest.
Fran Perea alcanzou o número 1 nas listas musicais en 2003 co tema “1+1 son 7”. Aquel mesmo ano publicou La chica de la habitación de al lado, con temas compostos por artistas como Pau Donés, Coti e Xabi San Martín. En 2005 chegou Punto y aparte e, en 2010, Viejos conocidos, xa baixo o seu propio selo discográfico.
En 2023, Perea presentou Uno más uno son 20, no que incluíu temas como Mi corazón, La vida al revés, Me sale a cuenta (xunto a Rayden) ou unha nova versión de Uno más uno son 7, en colaboración con Despistaos. Esta coincidencia no cartel do festival alimenta as expectativas dunha posible colaboración sobre o escenario.
O festival conta co apoio da Xunta de Galicia a través da Axencia de Turismo de Galicia no marco dos Concertos do Xacobeo.