Galicia converterase no epicentro do turismo náutico co 6º Simposio de Clubs Náuticos en Sanxenxo
Galicia acollerá os días 3 e 4 de outubro en Sanxenxo o 6º Simposio de Clubs Náuticos, un evento de referencia que converterá a comunidade no epicentro do turismo náutico nacional. A presentación oficial tivo lugar este luns coa participación do director de Turismo de Galicia, Xosé Merelles, e do presidente de Portos de Galicia, José Antonio Álvarez.
Organizado pola Confederación Española de Asociacións de Clubs Náuticos (CEACNA) e pola Asociación de Clubs Náuticos de Galicia (ASNAUGA), o simposio conta co apoio da Xunta e abrirá as súas portas o 2 de outubro cun acto inaugural. Durante dúas xornadas, representantes de clubs náuticos de todo o Estado reflexionarán sobre os retos e oportunidades do sector no século XXI, abordando cuestións como a lexislación, fiscalidade, sustentabilidade, participación xuvenil e náutica social.
Xosé Merelles destacou o crecemento do turismo náutico en Galicia, que conta actualmente con 73 portos deportivos e 10.500 prazas de amarre. En 2024 rexistráronse 6.321 barcos en tránsito que xeraron preto de 37.000 noites de estancia, cunha media de 6 días por embarcación e uns ingresos de 7,5 millóns de euros.
O director de Turismo lembrou eventos destacados como a saída da Volvo Ocean Race desde Vigo en 2005, a celebración das 52 Super Series en Baiona nos anos 2022 e 2025 ou a Global Solo Challenge con saída e regreso na Coruña na súa primeira edición e en Vigo na de 2027-2028.
Merelles subliñou a aposta da Xunta por este sector estratéxico, cun investimento de máis de 3 millóns de euros en 2024 procedentes dos fondos Next Generation para mellorar as infraestruturas portuarias. Tamén destacou a súa capacidade para desestacionalizar o turismo e a súa vinculación co turismo MICE ou de congresos, unha das vías estratéxicas da Estratexia de Turismo de Galicia 2030.