Actualidade | Educación

A Xunta busca revalidar por terceiro ano o liderado de Galicia na escolarización infantil de 0 a 3 anos, cunha taxa do 60,6 %, moi por enriba da media estatal e xa por riba dos obxectivos europeos para 2030.

O director xeral de Familia, Infancia e Dinamización Demográfica, Jacobo Rey, destacou na Comisión 5ª do Parlamento de Galicia que Galicia conseguiu por segundo ano consecutivo o liderado estatal en escolarización infantil na etapa de 0 a 3 anos. O obxectivo da Xunta é manter esta posición no vindeiro curso, revalidando o liderado por terceiro ano seguido.

Rey fixo balance do curso 2024-2025 na rede de escolas infantís galega, formada por máis de 550 centros en todo o territorio. Subliñou que este foi o terceiro curso consecutivo no que se aplicou o programa de gratuidade total para todo o alumnado matriculado, un programa pioneiro que, segundo sinalou, converte a Galicia en referente estatal e modelo a seguir por outras comunidades.

A Xunta destina 65 millóns de euros de fondos propios a este programa, sen achegas do Goberno central, o que permite dispoñer de máis de 32.000 prazas e supón un aforro medio de 3.000 euros anuais por familia.

A taxa de escolarización en Galicia na etapa 0-3 sitúase no 60,6 %, fronte ao 48 % da media estatal, superando xa amplamente o obxectivo europeo do 45 % marcado para 2030. “Galicia supera en máis de 15 puntos ese obxectivo, seis anos antes do previsto, con cifras comparables ás dos países con maior benestar do mundo”, concluíu Rey.