Galicia rexistra unha baixada sostida no consumo de alcohol e drogas entre o alumnado de secundaria
O presidente da Xunta de Galicia, Alfonso Rueda, destacou que os resultados da enquisa Estudes 2025 amosan unha tendencia sostida á baixa no consumo de alcohol, tabaco, cannabis e outras substancias entre o alumnado galego de 14 a 18 anos.
O informe foi abordado no Consello da Xunta e confirma que Galicia presenta un perfil de consumo máis favorable que a media estatal, consolidando un modelo de prevención que busca protexer a saúde da mocidade.
Neste sentido, Rueda lembrou que acaba de entrar en vigor a Lei de protección da saúde das persoas menores e prevención de condutas aditivas, que sitúa Galicia como a primeira comunidade autónoma en prohibir a venda de bebidas enerxéticas e vapeadores a menores.
Descenso do consumo de alcohol e tabaco
Segundo os datos da enquisa, o consumo intensivo ocasional de alcohol entre adolescentes galegos reduciuse á metade nos últimos dous anos, pasando do 12,3 % en 2023 ao 5,8 % en 2025.
O alcohol continúa a ser a substancia máis consumida, cunha prevalencia do 72,9 % algunha vez na vida, aínda que esta cifra tamén descende máis de dous puntos respecto ao estudo anterior.
O consumo recente, referido aos últimos 30 días, sitúase no 51,3 %, tamén por debaixo do rexistro estatal e en descenso respecto ao 58,8 % de 2023.
No caso do tabaco, o consumo continúa diminuíndo e xa se sitúa nun nivel minoritario no consumo diario, cun 5,6 %.
Evolución do consumo doutras substancias
O consumo de cannabis tamén mantén unha tendencia descendente, cunha prevalencia do 20,2 % algunha vez na vida e unha redución clara no consumo recente, que baixa do 18,6 % ao 12,2 %.
No caso dos hipnosedantes, Galicia mantense tamén por debaixo da media estatal, especialmente no consumo sen prescrición médica.
As bebidas enerxéticas presentan unha prevalencia do 31,3 %, sete puntos por debaixo da media española, sendo máis frecuente o seu consumo entre os rapaces.
Comportamentos dixitais
O estudo tamén analiza os comportamentos dixitais da mocidade. En Galicia, o 15,5 % do alumnado presenta un uso problemático de internet, unha cifra inferior á media estatal, situada no 19,4 %.
No caso das redes sociais, o uso problemático nos últimos 30 días sitúase no 20 %, mentres que o 83,7 % do alumnado afirma xogar a videoxogos.
O xogo problemático con cartos continúa sendo residual entre menores, cunha incidencia aproximada do 4,4 %.
Prevención e hábitos saudables
Segundo destacou o presidente da Xunta, estes resultados están relacionados cun cambio nos hábitos de ocio da mocidade, con maior presenza da actividade física e deportiva.
De feito, o 74 % do alumnado galego asegura practicar algún deporte semanalmente.
Ademais das medidas lexislativas, a Xunta de Galicia desenvolve programas de prevención en centros educativos e iniciativas como as plataformas Sanidade Mediaverso e Xanela aberta.
Entre os programas educativos destacan iniciativas como Apuntámonos a non beber, Clases sen Fume ou Adestrar sen pantallas, gañar en saúde.