Galicia rexistrou o inverno meteorolóxico máis húmido do último cuarto de século
A conselleira de Medio Ambiente e Cambio Climático da Xunta de Galicia, Ángeles Vázquez, presentou o balance climatolóxico do inverno meteorolóxico elaborado por Meteogalicia, no que se conclúe que Galicia rexistrou o inverno máis húmido do último cuarto de século.
Segundo explicou a conselleira, a precipitación media acumulada nos meses de decembro, xaneiro e febreiro alcanzou os 800 litros por metro cadrado, o que supón un incremento do 81% respecto ao valor habitual neste período. Estes datos sitúan o inverno de 2025-2026 como o cuarto máis chuvioso da serie histórica.
Vázquez indicou que decembro non presentou unha anomalía de precipitación especialmente destacada, mentres que xaneiro e, sobre todo, febreiro rexistraron valores moi elevados. No caso de xaneiro, as precipitacións situáronse un 98% por riba do habitual, mentres que en febreiro a anomalía alcanzou o 160% respecto aos valores normais.
Un inverno cálido
No que respecta ás temperaturas, o inverno foi considerado cálido, cunha temperatura media de 9,1 graos, seis décimas por riba do valor climático de referencia. Con todo, a conselleira subliñou que foi máis frío que os dous invernos anteriores.
Esta anomalía térmica estivo marcada principalmente polo comportamento das temperaturas mínimas, que se situaron de media 2,8 graos por riba do valor habitual. Pola contra, as temperaturas máximas rexistraron unha lixeira desviación negativa de tres décimas respecto á media.
Balance climatolóxico de febreiro
A responsable autonómica tamén presentou o informe correspondente ao mes de febreiro, que se caracterizou por ser extremadamente húmido e moi cálido.
Durante ese mes acumuláronse 304 litros por metro cadrado de precipitación media, un 160% máis do habitual, polo que para atopar un febreiro máis chuvioso hai que remontarse ao ano 1979.
Segundo explicou Vázquez, nas dúas primeiras semanas de febreiro produciuse unha chegada continua de borrascas moi activas, mentres que na segunda metade do mes, aínda que os sistemas frontais foron menos frecuentes, continuaron rexistrándose precipitacións significativas.
En canto ás temperaturas, o mes de febreiro presentou unha media de 10,3 graos, cunha anomalía positiva de 1,5 graos respecto ao valor normal. A temperatura mínima media situouse nos 5,4 graos, mentres que a máxima alcanzou os 12,4 graos, valores algo superiores aos habituais para esta época do ano.