Galiza Nova presenta a campaña do 8M baixo o lema Mulleres libres na Galiza liberada

Santiago de Compostela, 28 de febreiro de 2025.- A organización xuvenil do BNG, Galiza Nova, presentou hoxe a súa campaña para o 8 de marzo, Día Internacional da Muller Traballadora, baixo o lema Mulleres libres na Galiza liberada. Con esta iniciativa, a entidade pon o foco en como a precariedade que afecta á mocidade galega é aínda máis dura no caso das mozas, debido á desigualdade de xénero.
Sabela Méndez, Responsable Nacional de Mulleres da organización, denunciou que "a situación do emprego, do acceso á vivenda ou da emigración xuvenil son aínda peores para as mozas galegas". Segundo explicou, “a fenda salarial sitúase entre o 15 e o 20%, e se a isto lle sumamos a precarización, a temporalidade e a parcialidade no emprego que por defecto sufrimos a mocidade, en que situación nos deixa ás mozas?”.
Desde Galiza Nova sinalan que a desigualdade estrutural fai que as mulleres enfronten maiores dificultades para a súa emancipación. “O patriarcado dificulta aínda máis a nosa independencia, xa que a feminización da pobreza e a carga dos coidados familiares impóñennos a obriga de atrasar os nosos proxectos de vida”, advertiu Méndez.
A organización tamén sostén que “a loita por un emprego digno, polo acceso á vivenda e contra a precariedade non poden entenderse sen a loita pola liberación de Galiza”. Segundo afirman, “vivimos nun país sen dereito a decidir por si mesmo, e iso condiciona aínda máis as nosas condicións de vida. De aí a nosa reivindicación: ser mulleres libres na Galiza liberada”.
A campaña desenvolverase a través de publicacións en redes sociais que explicarán a realidade específica das mozas galegas en canto a emprego, vivenda e emigración. Ademais, organizaranse actos formativos e accións de axitación cara ás mobilizacións feministas previstas para o propio 8 de marzo.