“Galiza pola Paz” lanza unha convocatoria de mobilizacións contra a escalada belicista o 9 de abril nas cidades galegas
A plataforma “Galiza pola Paz” convoca mobilizacións para o vindeiro martes 9 de abril nas sete cidades galegas para reclamar o fin da escalada militar e unha aposta firme pola paz. As concentracións terán lugar ás 19:30h en distintos puntos das cidades, como a Praza Roxa en Santiago ou a Praza Vella en Ferrol.
Durante a presentación en Compostela, Marta Romero, en representación da plataforma, fixo un chamamento a todas as entidades galegas a sumarse ao manifesto común, lembrando que o militarismo "non leva a ningures, agás á destrución".
O manifesto denuncia o aumento do gasto militar europeo e estatal, que superará o 2% do PIB antes de 2029, sen debate público e en detrimento dos servizos sociais. A plataforma alerta ademais do uso de instalacións galegas por parte da OTAN e da crecente presión sobre os recursos naturais do país para fins militares.