Garda Costas decomisa 720 cacharros e libera 117 kg de polbo en A Guarda
O Servizo Autonómico de Gardacostas de Galicia decomisou 720 cacharros empregados para a captura de polbo, nun operativo levado a cabo pola patrulleira Mar de Galicia a catro millas ao oeste do porto da Guarda. No interior destes aparellos localizáronse 117 quilos de polbo de pequeno tamaño, que foron devoltos ao mar.
Esta actuación enmárcase nas tarefas de vixilancia e control que desenvolve este departamento dependente da Consellería do Mar, co obxectivo de garantir o cumprimento do plan de explotación da especie en augas galegas.
Os axentes subliñan que tanto a cantidade como a talla do polbo liberado son un bo indicador da reprodución do cefalópodo na costa galega. Tamén destacan a importancia deste tipo de operativos, que contribúen á explotación sostible dun recurso esencial, do que neste ano xa se capturaron 1.218 toneladas, por un valor superior aos 12,8 millóns de euros, un 21 % máis que en 2024.
No que vai de ano, o servizo leva retirados 14.000 cacharros en todo o litoral galego, o 88 % entre a ría de Vigo e A Guarda. Un traballo especialmente intenso durante a parada biolóxica (abril) e a veda (maio e xuño), períodos destinados á recuperación do recurso. Desde Gardacostas lembran que os infractores poden enfrontarse a sancións e mesmo á retirada do permex.