Inícianse os trámites para a mellora da seguridade en 12 tramos do Camiño de Inverno
O Diario Oficial de Galicia (DOG) vén de publicar o anuncio de Turismo de Galicia polo que se somete ao trámite de información pública o proxecto de trazado e construción dos 12 treitos comúns no Camiño de Inverno, situados nos concellos de Carballeda de Valdeorras, O Barco de Valdeorras, A Rúa, Quiroga, Monforte de Lemos, Chantada, Rodeiro e Lalín.
O prazo para formular alegacións relativas á actuación, así como solicitar a revisión de posibles erros da relación de bens, dereitos e persoas propietarias afectadas polo proxecto, permanecerá aberto durante 30 días a contar desde este mesmo venres, 20 de febreiro.
Este plan de trazado dos treitos comúns no Camiño de Inverno enmárcase no proxecto de mellora da seguridade viaria dos peregrinos no Camiño de Santiago no horizonte do vindeiro Xacobeo 2027. As actuacións, cun orzamento total de ata 40 millóns de euros, afectarán a máis de 150 quilómetros dos nove Camiños de Santiago e buscan afastar aos peregrinos das zonas perigosas de circulación.