Laura Ferrero, Fernando Iwasaki e Noemí Sabugal, finalistas do Premio Julio Camba
Os textos de Laura Ferrero, Fernando Iwasaki e Noemí Sabugal foron elixidos como finalistas da 46ª edición do Premio Internacional Afundación de Periodismo Julio Camba, un dos galardóns máis prestixiosos do xornalismo de opinión en lingua española.
Ferrero concorre ao premio co artigo «Que vengan a buscarte», publicado no diario El País; Fernando Iwasaki é finalista polo texto «A favor del sombrero», difundido en ABC; mentres que Noemí Sabugal participa coa columna «Escuchar es un arte», tamén publicada en El País.
O xurado, presidido este ano polo escritor leonés e membro da Real Academia Española José María Merino, volverá reunirse o próximo 14 de xaneiro pola mañá para elixir á persoa gañadora. A decisión darase a coñecer ese mesmo día durante un acto que se celebrará ao mediodía no Hotel Palace de Madrid.
O premio está dotado con 10.000 euros e, como novidade nesta edición, as dúas persoas finalistas recibirán un premio de 2.000 euros cada unha, recoñecendo así a calidade dos traballos seleccionados.
A coordinadora da área de Cultura de Afundación, Marité Cores, destacou que nesta edición se presentaron 238 candidaturas procedentes de 17 países, das cales 179 chegaron desde España. Arxentina, con 15 artigos, Colombia, con 11, e Venezuela, con 5, foron os seguintes países con maior número de propostas. “A calidade dos textos volveu poñerllo moi difícil ao xurado para escoller só tres finalistas”, sinalou.
O xurado
Xunto a José María Merino, integran o xurado o director da Fundación Gabo, Jaime Abello; a escritora e xornalista Cristina Sánchez Andrade; o gañador da pasada edición, Alberto Olmos; e o tamén escritor e xornalista Ramón Pernas. O secretario do xurado é o director de Comunicación de ABANCA, Isaac González Toribio.
Antes de Merino, ocuparon a presidencia do xurado figuras como Gonzalo Torrente Ballester e Alfredo Conde, desde a creación do premio en 1980.
Con case 50 anos de historia, o Premio Internacional Afundación de Periodismo Julio Camba consolidouse como un dos referentes do xornalismo de opinión en español. A persoa gañadora desta edición sumarase a unha ampla nómina de autores e autoras recoñecidas ao longo das últimas décadas.