Lorenzana destaca que o Plan Renova o teu vehículo impulsa as matriculacións en Galicia na inauguración do Salón do Automóbil de Vigo
A conselleira de Economía e Industria da Xunta de Galicia, María Jesús Lorenzana, participou este mércores na inauguración do Salón do Automóbil de Vigo 2026, onde destacou o impacto do Plan Renova o teu vehículo no incremento das matriculacións en Galicia.
Segundo explicou, Galicia lidera o crecemento de matriculacións de turismos en España durante o mes de febreiro cun aumento do 31 %, catro veces superior á media estatal, situada no 7,5 %.
Lorenzana, acompañada pola delegada territorial da Xunta en Vigo, Ana Ortiz, subliñou que no último mes os concesionarios galegos venderon máis de 2.800 vehículos e que, no que vai de ano, xa se superan as 5.000 unidades matriculadas.
A conselleira destacou que o Plan Renova o teu vehículo, dotado cun orzamento de 3,5 millóns de euros, esgotou o crédito destinado a particulares en apenas un mes desde a súa convocatoria o pasado 22 de xaneiro. As axudas poden chegar ata os 4.600 euros e tramítanse directamente a través dos concesionarios, o que permite axilizar o proceso.
Neste sentido, Lorenzana comparou esta fórmula co plan estatal Moves, sinalando que o programa autonómico resulta máis áxil e menos burocrático, ao ser a propia Xunta a que realiza o pago das axudas directamente aos concesionarios. Por iso, expresou o seu desexo de que este modelo poida servir de referencia para o futuro plan estatal Auto Plus.
Durante a súa intervención, a conselleira lembrou que o sector da automoción atravesa un momento de transformación cara á electrificación e ás novas tecnoloxías máis eficientes, un proceso que considera clave para manter a competitividade industrial. Tamén defendeu a necesidade de que a regulación permita unha transición gradual tanto para a industria como para as persoas consumidoras.
Finalmente, puxo en valor a relevancia de eventos como o Salón do Automóbil de Vigo, que cualificou como un importante escaparate para achegar ao público as novidades do sector e impulsar o cambio cara a unha mobilidade máis sostible.