Lugo rexistra decenas de incidencias tras una intensa treboada que afectou ao alumeado e á rede semafórica
Lugo traballa este luns para recuperar a normalidade despois da intensa treboada rexistrada durante a madrugada, que deixou decenas de incidencias en diferentes puntos da cidade e afectou especialmente á rede semafórica, ao alumeado público e a varias vías de circulación.
A tormenta, acompañada de fortes choivas, tronos e raios, comezou pasada a medianoite do domingo ao luns e o forte estrondo espertou numerosos veciños. Varias zonas da cidade quedaron sen subministración eléctrica durante varios minutos e a práctica totalidade da rede semafórica resultou afectada, mentres que tamén se rexistraron cortes no alumeado público.
En total, 934 clientes da compañía eléctrica quedaron sen subministración, aínda que ás 04.00 horas da madrugada o servizo xa estaba restablecido para todos agás uns 100 clientes. Os traballos continúan para recuperar o subministro no resto dos puntos afectados o antes posible.
O temporal tamén provocou a caída de árbores, pólas e postes, así como a presenza de cables e outros elementos sobre a calzada. Desde a madrugada, os servizos municipais de Bombeiros, Policía Local e eléctricos permanecen mobilizados para atender as incidencias e avanzar na recuperación dos servizos afectados.
Entre as intervencións realizadas figura a retirada ou aseguramento de árbores danadas ou caídas na Ronda de Fingoi, Seoane e San Xoán do Campo, San Xulián de Bocamaos, a estrada vella de Santiago, O Burgo, Bagueixos, Calde e Adai, ademais doutras zonas.
Tamén se actuou ante ramas sobre a calzada na Louzaneta e na Fervedoira, cables sobre a vía na estrada do Rato e un poste caído no Camiño de Gustavo. Na Ronda de Fingoi interveuse igualmente ante outro exemplar que estaba a piques de caer.
As incidencias deixadas pola treboada non se limitaron á vexetación. Os servizos municipais atenderon tamén lousas soltas no Perpetuo Socorro e un alpendre danado en Soñar, entre outras actuacións relacionadas cos efectos do temporal.
Un dos principais focos de traballo continúa sendo a rede semafórica, afectada en puntos como San Roque, Ronda das Mercedes, Ronda da Muralla, avenida das Américas, Augas Férreas, Ramón Ferreiro, Ronda de Fingoi, Adolfo Suárez e avenida da Coruña.
No caso do alumeado público, tamén se rexistraron problemas en zonas como Fonte dos Ranchos e Castelo de Arriba. Os equipos eléctricos traballan para recuperar progresivamente o funcionamento tanto do alumeado como dos semáforos.
Desde o Goberno local sinalan que os danos ocasionados pola tormenta son dos máis importantes que se lembran nos últimos tempos. Os traballos continuarán ao longo deste luns para retirar os elementos que poidan representar un risco e restablecer os servizos públicos afectados.
A alcaldesa de Lugo, Elena Candia, agradeceu aos funcionarios municipais o traballo realizado desde a madrugada e destacou a súa resposta para atender as numerosas incidencias provocadas pola treboada.
O Concello pide á cidadanía que extreme as precaucións nos desprazamentos mentres continúan as tarefas de limpeza, retirada de árbores e pólas e recuperación da rede semafórica e do alumeado público.
A intensa actividade eléctrica afectou tamén a outros puntos de Galicia. En 24 horas contabilizáronse máis de 2.000 raios na comunidade, con incidencias en diferentes localidades, entre elas cortes na subministración eléctrica.