Luis López presenta as bases dos tres plans de acción comunitaria para 2026 cunha inxección de 3,24 millóns de euros
O presidente da Deputación de Pontevedra, Luis López, presentou en Tomiño as bases das tres liñas de acción comunitaria para o ano 2026, cun investimento total de 3,24 millóns de euros destinados a reforzar o apoio ao movemento veciñal da provincia. O acto contou coa participación do deputado responsable do Servizo de Acción Comunitaria, Javier Tourís, e reuniu a representantes de colectivos da comarca do Baixo Miño.
As novas convocatorias corresponden á terceira edición dos plans Provincia Comunitaria e +Aqua, dotados cada un con 1,44 millóns de euros, e á segunda edición do programa +Novaqua, cun orzamento inicial de 360.000 euros. O goberno provincial decidiu incrementar as partidas destes plans ante o elevado nivel de demanda rexistrado en convocatorias anteriores.
O Plan Provincia Comunitaria permitirá ás entidades veciñais acceder a axudas de entre 6.000 e 10.000 euros para executar obras de acondicionamento, reforma ou ampliación de locais sociais, así como para a adquisición de equipamentos, mobiliario ou material informático e audiovisual. Nas dúas primeiras convocatorias beneficiáronse deste programa 402 entidades de 61 concellos da provincia.
Pola súa banda, o Plan +Aqua destínase ás comunidades de augas veciñais, que poderán solicitar axudas do mesmo importe para mellorar ou reparar infraestruturas de abastecemento, impulsar actuacións de dixitalización, sustentabilidade e eficiencia enerxética, mellorar os sistemas de tratamento e calidade da auga ou regularizar concesións e captacións. Nas edicións anteriores resultaron beneficiarias 439 comunidades de augas de toda a provincia.
O terceiro programa, +Novaqua, céntrase na regularización das traídas veciñais de auga, financiando proxectos técnicos, analíticas, estudos topográficos, gastos de xestión ou taxas administrativas, con achegas que oscilan entre os 350 e os 4.000 euros. A primeira edición deste plan permitiu apoiar a 70 colectivos.
O prazo de presentación de solicitudes para as tres convocatorias xa está aberto e permanecerá vixente ata o vindeiro 1 de abril.
Luis López destacou que, neste mandato, máis de 900 entidades veciñais —preto de 80 da comarca do Baixo Miño— beneficiáronse destes programas. “O que funciona, refórzase. Queremos atender a máis colectivos, executar máis proxectos e construír unha provincia máis forte, máis equilibrada e máis xusta”, afirmou o presidente provincial.
Antes do encontro celebrado en Tomiño, Luis López e Javier Tourís visitaron varias asociacións veciñais do Concello de Salceda de Caselas e coñeceron de primeira man as melloras realizadas grazas ás axudas provinciais concedidas nos últimos anos.