Lydia Pérez fai historia ao gañar o 4º Ranking Series Mundial de Loita Praia
A deportista pontevedresa Lydia Pérez Touriño fixo historia ao acadar a medalla de ouro no 4º Ranking Series Mundial de Loita Praia na categoría de -60 kg, disputado os días 27 e 28 de setembro en Katerini (Grecia).
Na fase de grupos impúxose a Christina Papadopoulou (Grecia), Evdoxia Papadopoulou (Grecia), Viviane Bettina Herda (Alemaña) e Anastasiya Kravchenko (Ucraína). En semifinais derrotou a Oksana Moskalova (Ucraína) e, xa na final, sorprendeu a todo o mundo vencendo contra prognóstico á medallista mundial Sofiia Kushnir (Ucraína).
Con seis combates gañados sobre a area grega, Lydia Pérez pon rumbo á final mundial que se celebrará en Alexandría (Exipto) do 17 ao 19 de outubro. Nesta última cita, os puntos de clasificación multiplicaranse por catro, o que podería converter á pontevedresa na única deportista española en acadar medalla mundial nesta disciplina.
Outros integrantes da expedición española, como Victoria Báez e Carlos Álvarez, non lograron acceder á loita polas medallas. Pola súa banda, o técnico Pedro García destacou a evolución de Lydia e confirmou que o equipo apostará forte pola final mundial de Alexandría.