Máis de 1.000 alumnos e docentes participan este verán en cursos de idiomas no estranxeiro co programa Galemundo da Xunta
Máis de 1.000 alumnos e docentes galegos participan este verán en cursos de idiomas no estranxeiro ao abeiro do programa Galemundo, co que a Xunta de Galicia promove a internacionalización do ensino. A Consellería de Educación, Ciencia, Universidades e FP destina este ano máis de 15 millóns de euros a esta iniciativa, que reúne todas as bolsas autonómicas nesta área para facilitar que alumnado e profesorado melloren as súas competencias lingüísticas noutros países. Ao longo do curso 2024/25 beneficiáronse dela máis de 7.000 persoas.
Esta semana, a directora xeral de Ordenación e Innovación Educativa, Judith Fernández, despediu no aeroporto Rosalía de Castro, en Santiago, un grupo de 60 estudantes de Bacharelato rumbo a Reino Unido. Forman parte dos 641 alumnos que realizan estadías de tres semanas en réxime residencial ou familiar en Reino Unido, Francia, Canadá e Alemaña. A Xunta inviste preto de 2 millóns de euros nesta actividade, subvencionando entre o 92 % e o 69 % do custo das estancias, incluíndo gastos de monitores, mantemento, docencia, actividades complementarias, seguros e certificado do curso.
No ámbito universitario, 178 estudantes das tres universidades públicas galegas reciben bolsas de ata 1.500 € para realizar cursos de idiomas de, polo menos, 45 horas lectivas entre o 1 de xuño e o 31 de agosto. Os destinos máis elixidos son Canadá, Malta, Irlanda, Italia, Reino Unido e Francia.
Pola súa parte, 238 docentes galegos perfeccionaron este xullo o seu nivel lingüístico en Reino Unido, Francia e Portugal, e outros 57 farano no primeiro trimestre do curso 2025/26, integrándose en centros educativos de Canadá, Francia e Portugal. A Consellería destina máis de 1 millón de euros a cubrir docencia, aloxamento, manutención, actividades culturais e desprazamento.
O programa Galemundo abrangue tamén outras accións de intercambio e mobilidade durante o curso, tanto dentro do Erasmus como en países extracomunitarios, reafirmando a aposta da Xunta polo plurilingüismo e a formación internacional de calidade.