Máis de 130 palistas compiten en Ribadeo na terceira cita da Copa Deputación de Piragüismo
A ría de Ribadeo converteuse este domingo no escenario da terceira proba da Copa Deputación de Piragüismo, unha competición que continúa percorrendo distintos puntos da provincia coa participación dos principais clubs lucenses desta disciplina deportiva.
A regata, organizada polo Club de Piragüismo Altruán e patrocinada pola Vicepresidencia da Deputación de Lugo, congregou a máis de 130 deportistas procedentes dos seis clubs de augas tranquilas que toman parte nesta edición do torneo. Xunto ao club anfitrión participaron tamén o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo.
As distintas probas desenvolvéronse ao longo da tarde nun ambiente marcado pola competitividade e o compañeirismo entre os participantes. Ao remate da xornada, o Club Fluvial de Lugo encabezou a clasificación por equipos, seguido polo Cidade de Lugo e polo Altruán, que completaron os tres primeiros postos do podio colectivo.
O deputado de Mocidade, Daniel García, participou na entrega de premios aos mellores clasificados dunha competición que consta de seis regatas e que busca fomentar a práctica do piragüismo na provincia.
A Copa Deputación desenvólvese grazas á colaboración entre a Vicepresidencia da Deputación de Lugo e a Federación Galega de Piragüismo, unha iniciativa orientada a facilitar que os clubs poidan competir en probas federadas próximas ao seu ámbito de actuación e a fortalecer o traballo das categorías de base, fundamentais para o futuro deste deporte.