Máis de 25 equipos internacionais concorren ao concurso de iluminación da contorna da Catedral
O Concello de Santiago informou que o martes 19 de agosto concluíu o prazo de presentación de propostas ao Concurso Internacional de Iluminación Ornamental e Artística da contorna monumental da Catedral. En total, concorreron 26 equipos e estudos multidisciplinares de países como Reino Unido, Alemaña, Italia ou Finlandia, ademais de España e Galicia, todos con experiencia en proxectos de iluminación monumental.
A convocatoria desenvolveuse baixo o lema “Compostela nocturna, mírame!”, cunha intensa campaña de comunicación que incluíu materiais audiovisuais en galego, castelán e inglés, unha web trilingüe con documentación técnica e unha ampla difusión en redes sociais e plataformas profesionais internacionais de deseño lumínico. A Oficina técnica do concurso, xestionada pola compostelá Trivium en colaboración con Light Collective e SlowLight, impulsou tamén contidos divulgativos e entrevistas que situaron a Santiago no mapa internacional da innovación lumínica.
Este certame pioneiro, vinculado ao Plan de Sostibilidade Turística, busca reinterpretar a contorna monumental da Catedral –recoñecida pola UNESCO como Patrimonio Mundial– dende unha perspectiva estética e de vangarda técnica, mellorando tanto a experiencia da cidadanía como das persoas visitantes. As prazas do Obradoiro, Praterías, Quintana e Inmaculada, xunto cos seus elementos conectores, serán os espazos protagonistas.
O concurso desenvólvese en dúas fases anónimas, avaliadas por un xurado independente composto por representantes institucionais e expertos internacionais como David Chipperfield, Teresa Táboas, Roger Narboni, Esther Torelló ou Manuel Castiñeiras. Valorarase a calidade do deseño lumínico, a viabilidade técnica e económica, así como a sustentabilidade e a innovación das propostas.
A proposta gañadora recibirá un premio de 15.000 euros e asumirá a redacción do proxecto e a dirección da obra de iluminación da praza de Praterías, proxecto piloto desta iniciativa, cun orzamento de 100.000 euros (IVE excluído). Ademais, até un máximo de seis finalistas, incluído o gañador, serán gratificados coa mesma cantidade.