Máis de 45.000 persoas maniféstanse en 29 localidades galegas contra a política forestal do PP e en solidariedade coas afectadas polos lumes
Un total de 29 localidades de toda Galiza acolleron hoxe mobilizacións multitudinarias convocadas pola plataforma Por un monte galego con futuro, que reuniron a máis de 45.000 persoas para rexeitar a política forestal do PP e mostrar solidariedade coas persoas afectadas pola actual vaga de incendios, así como co persoal do dispositivo contra o lume.
O secretario xeral da CIG, Paulo Carril, participou na concentración de Verín, onde reclamou medidas inmediatas para recuperar os bens e paliar as consecuencias do desastre medioambiental, ademais de urxir actuacións “para que o que estamos a padecer estes días non volva acontecer”.
A plataforma, integrada por máis de 50 colectivos e asociacións, naceu en 2018 para promover iniciativas lexislativas populares de protección do bosque autóctono e contra o último Plan Forestal da Xunta. No manifesto difundido hoxe, trasladou o seu apoio ás persoas afectadas e ao persoal de prevención e extinción, que denuncian traballar en condicións de precariedade e falta de medios.
Os convocantes sinalan que esta “traxedia ambiental, social, cultural e económica” ten como causa directa o abandono do rural e a expansión do monocultivo de especies de crecemento rápido, como o eucalipto. Por iso, consideran imprescindible reclamar unha moratoria indefinida ás novas plantacións e denunciar a inutilidade do PLADIGA, aprobado sen un debate real nin representación plural.
A CIG reclamou ademais unha partida económica urxente para apoiar ás afectadas, un plan de choque que evite a erosión dos solos e a contaminación das augas, e a creación dun único servizo público de prevención e extinción de incendios, dependente da Xunta, con profesionais formados para traballar todo o ano.
Carril advertiu de que o monte galego se converteu nun “polvorín” pola política forestal do PP, que “entregou o rural a intereses especulativos” e provocou a destrución das actividades produtivas que garantían poboación e vida no territorio. Ao mesmo tempo, urxiu a depuración de responsabilidades e insistiu en que as mobilizacións deben servir para forzar un cambio estrutural nas políticas forestais que evite novas vagas de lume.