Manuel Turizo actuará na Coruña sendo a única cita galega na súa xira '201 Tour'
O cantante colombiano Manuel Turizo actuará en A Coruña o domingo 19 de outubro de 2025 dentro da súa xira española “201 Tour”, unha serie de 15 concertos que o levarán por todo o país para presentar o seu novo traballo discográfico, 201. A data na cidade herculina está xa confirmada na súa xira oficial, aínda que polo momento o recinto que acollerá o espectáculo segue “sen confirmar”.
O concerto promete unha experiencia única e inmersiva, recreando no escenario o ambiente do seu “Apartamento 201”, espazo creativo que inspirou o seu novo álbum. Con esta posta en escena, Turizo busca ofrecer moito máis ca música en directo: unha inmersión total no universo persoal e artístico que deu forma ao seu último disco.
Nado en Montería (Córdoba, Colombia) o 12 de abril de 2000, Manuel Turizo é hoxe unha das voces máis recoñecidas da música latina, grazas á súa habilidade para fusionar estilos como o reguetón, o pop, o trap ou o vallenato. Alcanzou a fama internacional en 2017 co tema “Una Lady como tú”, que superou os mil millóns de reproducións en YouTube e marcou o inicio dunha carreira meteórica.
Desde entón, publicou discos de grande éxito como ADN (2019), Dopamina (2021), 2000 (2023) e o recentemente lanzado 201 (2025), co que vén de iniciar unha xira mundial.
Entre os seus temas máis escoitados destacan “La Bachata” —con máis de 2.000 millóns de reproducións en Spotify—, “El Merengue”, “Vaina Loca”, “Copa Vacía” (xunto a Shakira), “Culpables” e “Déjala que vuelva”. A súa traxectoria valeulle numerosos recoñecementos, entre eles o premio a Mellor Artista en Directo na Categoría Global Latina nos LOS40 Music Awards 2024.
Turizo tamén compartiu estudos e escenarios con estrelas internacionais como Nicky Jam, Ozuna, Marshmello, Anuel AA, Piso 21 ou Lola Índigo. Medios como Forbes —coa súa inclusión no “30 Under 30”— e GQ, que o nomeou “Home do Ano”, destacan a súa relevancia cultural e musical nun panorama cada vez máis globalizado.
A parada coruñesa do “201 Tour” promete ser unha cita destacada no calendario musical do outono en Galicia. As entradas estarán dispoñibles nas próximas semanas.