Marco Veiga impúxose no XIII DHU Vila de Sarria ante milleiros de afeccionados
Sarria volveu vibrar esta fin de semana coa celebración do XIII DHU Vila de Sarria, unha cita organizada polo DHG Team que congregou a milleiros de persoas nas rúas da localidade para seguir unha das probas de descenso urbano máis destacadas do calendario.
O gran triunfador da competición foi Marco Veiga Amado, do Ciclosquintena C., que se proclamou vencedor da clasificación scratch e da categoría Elite cun tempo de 1:17,269, o mellor rexistro da fin de semana. O podio absoluto completárono Leo Álvarez Alonso, do Pulpeiros GFR Performance, cun tempo de 1:18,426, e Aaron Caballero Bello, do DH Galicia C., que marcou 1:19,535.
Na categoría Sub23, a vitoria foi para Sergio Veiga Amado (Pontebike Team), seguido por David López García (THC Bike) e Ismael Couto Tabernero (DH Galicia). Entre os Júnior, o primeiro posto foi para Leo Álvarez Alonso, por diante de Hugo López Canales e Daniel Vázquez Díaz.
Na categoría Cadete, Iago Pérez Rodríguez subiuse ao máis alto do podio, seguido por Lois Ambrosio Collazo e David Vázquez Pastoriza.
En Máster 30, o vencedor foi Santos Lemos Ramírez, mentres que Víctor Sáenz Durán logrou a vitoria en Máster 40. Pola súa banda, Alberto Vázquez Tourón foi o primeiro clasificado en Máster 50.
No apartado feminino, Alba Arias García conseguiu o triunfo na categoría Elite, con Eva Castro Fernández na segunda posición. En Sub23 feminina, a vencedora foi Cristina Menéndez González.
A organización felicitou a todos os participantes polo espectáculo ofrecido durante a fin de semana e agradeceu a presenza dos numerosos afeccionados que volveron converter o DHU Vila de Sarria nunha auténtica festa do descenso urbano.