María Galiana interpreta a unha nai maltratadora en A raíña de beleza de Leenane, nova proposta da Tempada de Abono do Teatro Afundación

Dirixida por Juan Echanove, a obra retrata unha complexa e tóxica relación entre nai e filla no rural irlandés
María Galiana
19 Feb 2025

Vigo, 19 de febreiro de 2025 - A raíña de beleza de Leenane, a última proposta da Tempada de Abono de Teatro da Obra Social de ABANCA en Vigo, chega este xoves 20 de febreiro ao Teatro Afundación. A obra, dirixida por Juan Echanove, céntrase nunha relación extremadamente tóxica entre nai e filla, que viven na casa familiar no remoto noroeste de Irlanda. A filla, Maureen, actúa como coidadora da súa nai, unha muller manipuladora e maltratadora. A situación complícase aínda máis coa chegada dos irmáns Pato e Ray Dooley, que desencadean unha espiral de tensión e violencia.

O elenco está encabezado por María Galiana e Lucía Quintana, que interpretan os papeis de nai e filla, respectivamente. A elas únense Javier Mora e Alberto Fraga, que interpretan aos irmáns Dooley, personaxes que cambian a dinámica familiar ao manter unha relación con Maureen, intensificando o conflito entre os personaxes.

Martin McDonagh, dramaturgo e cineasta británico-irlandés, escribiu esta obra en 1996, sendo esta a súa primeira que lle permitiu consolidarse como un dos autores máis relevantes da súa xeración.

Este montaxe estreouse en Madrid en xuño do pasado ano e recibiu unha excelente acollida tanto pola crítica como polo público. Os asistentes poderán desfrutar dunha representación que pon de manifesto a tensión emocional e a violencia que se xeran nun entorno familiar tóxico.

A Tempada de Abono de Teatro de Afundación continúa coa súa variada programación, que inclúe outras representacións como Una madre de película (con Toni Acosta) o 9 de marzo, a adaptación de La Regenta (10 de abril), e Malditos tacones (29 de maio), entre outras. O ciclo culminará con El Rey que fue (5 de xuño), unha sátira sobre a vida de Juan Carlos I.

Cultura por alimentos

A Tempada de Abono de Teatro tamén forma parte do programa solidario «Cultura por alimentos». Os asistentes poderán colaborar depositando produtos non perecedoiros nos contedores dispostos no teatro. As doazóns serán distribuídas pola Federación Española de Bancos de Alimentos (FESBAL) entre familias en risco de exclusión social de Vigo e a súa área metropolitana.

⚙ Configurar cookies
0.10935091972351