María Rivas reivindica os avances do Goberno en materia laboral e social co feminismo e a igualdade como eixos transversais
A Coruña, 3 de marzo de 2025. A subdelegada do Goberno na Coruña, María Rivas, aproveitou hoxe o acto de colocación da pancarta do 8 de marzo, Día Internacional da Muller, no balcón da Subdelegación para reivindicar os avances do Goberno en materia laboral e social, sempre co feminismo e a igualdade como eixos transversais.
Rivas destacou políticas como a ampliación dos permisos de maternidade e paternidade retribuídos, a posta en marcha de novos permisos para garantir os coidados de menores ao cargo e o incremento do salario mínimo interprofesional nun 61% desde 2018, do que se benefician maioritariamente as mulleres. Tamén fixo referencia á suba das pensións, que supuxo un incremento do 45% na retribución media das mulleres, e á reducción en 6,8 puntos da fenda salarial entre homes e mulleres.
"Son políticas que inciden directamente na calidade de vida das mulleres, propiciando máis traballo, mellores contratos, mellores pensións e máis posibilidades de conciliación", indicou a subdelegada. Ademais, destacou que, por primeira vez, superáronse os 10 millóns de mulleres ocupadas en España, un fito histórico nos rexistros laborais do país.
Rivas estivo acompañada pola vicesecretaria da Delegación do Goberno, Eva Vázquez Castelo, e pola xefa da Unidade de Violencia de Xénero da Subdelegación, Manuela Vilaboy. Informou que a pancarta feminista estará despregada durante toda a semana para dar visibilidade ao compromiso do Goberno de España coa igualdade e chamar á cidadanía a seguir defendendo os dereitos das mulleres.
Programación conmemorativa polo 8M
A subdelegada anunciou que a Delegación do Goberno e a Subdelegación levarán a cabo varias actividades para conmemorar o Día da Muller, enmarcadas na aposta do Goberno pola igualdade real. Entre estas iniciativas destacou unha xornada formativa sobre a nova regulación de Estranxeiría, centrada no impacto das novas normativas sobre as mulleres, que xa conta con case un centenar de persoas inscritas.
Ademais, participará nun encontro organizado pola Garda Civil con escolares, no que diferentes mulleres do corpo explicarán aos preto de 400 estudantes as súas funcións e experiencias profesionais. Rivas tamén será a encargada de inaugurar o ‘Foro Mulleres Referentes’, organizado polo periódico Quincemil, e asistirá ao acto institucional da Delegación do Goberno o 7 de marzo.