Actualidade

Ourense continúa en situación 2, con 8 grandes incendios activos que afectan a máis de 60.000 hectáreas. Outros lumes permanecen estabilizados ou controlados en Lugo, A Coruña e Pontevedra.

A Consellería do Medio Rural informou este martes da situación dos incendios forestais en Galicia con datos recollidos ata as 20.30 horas.

Ourense, en situación 2

Na provincia de Ourense permanece decretada a situación 2, o que implica unha maior mobilización de medios autonómicos, estatais e da Unidade Militar de Emerxencias (UME). Os grandes lumes activos son:

Chandrexa de Queixa e Vilariño de Conso, unidos nun único incendio que afecta a unhas 18.000 hectáreas.

Oímbra e Xinzo de Limia (A Granxa e Gudín), con 15.000 hectáreas queimadas.

A Mezquita-A Esculqueira, que supera as 10.000 hectáreas.

Larouco-Seadur, con máis de 20.000 hectáreas afectadas.

Carballeda de Avia-Beade, con 4.000 hectáreas.

Vilardevós-Vilar de Cervos (900 ha) e Vilardevós-Moialde (500 ha).

A Veiga-A Ponte, que supera as 20 hectáreas.

Están estabilizados os lumes de Maceda (3.500 ha), Vilardevós-Fumaces e A Trepa (100 ha), Riós-Trasestrada (20 ha) e Montederramo-Paredes (120 ha). Controlado queda o incendio de San Cibrao das Viñas-Rante (60 ha).

Lugo, A Coruña e Pontevedra

En Lugo están controlados os incendios de Cervantes-Vilarello (150 ha), O Saviñao-Chave (60 ha) e A Fonsagrada-Monteseiro (150 ha).
Na Coruña controlouse o lume de Muxía-Nosa Señora da O, con 23 hectáreas.
En Pontevedra segue estabilizado o incendio de Agolada-O Sexo (400 ha).

A Consellería lembra que o teléfono de emerxencias para avisar de calquera incendio é o 085, e que existe un número anónimo para denuncias, o 900 815 085.