Medra o desemprego, cae a afiliación á Seguridade Social e avanza a precariedade, segundo a CIG
Os datos do paro rexistrado de outubro amosan unha importante caída da afiliación media á Seguridade Social en Galiza, con 1.019 persoas menos respecto a setembro. As contratacións no ensino, coincidindo co inicio do curso escolar —con 5.894 novas altas—, amortecen esta baixada que se concentra sobre todo na actividade primaria, onde a afiliación descendeu un 18,7 % nun mes, e no sector servizos.
A caída non se limita ás ramas vencelladas ao turismo, senón que tamén afecta a administración pública e ás actividades sanitarias e de servizos sociais, que perderon un número significativo de persoas en alta laboral.
Segundo tipo de contrato e xornada, o maior incremento prodúcese entre as persoas con contrato fixo descontinuo, cun aumento do 8,5 % respecto a setembro. Tamén se incrementan os contratos indefinidos a tempo parcial, mentres que a contratación temporal descende en todos os sectores. Esta tendencia está directamente relacionada coa caída da afiliación no comercio e na hostalaría, sectores nos que abundan os contratos precarios.
En contraste, o número de persoas rexistradas no desemprego medrou un 0,3 % con respecto ao mes anterior, acadando as 113.386 persoas en situación de paro.
A CIG alerta dun mercado laboral inestábel e precario
Para o secretario confederal de Emprego e Negociación Colectiva da CIG, Francisco González Sío, estes datos evidencian a inestabilidade e estacionalidade do mercado laboral galego. “A taxa de ocupación en Galiza é case seis puntos inferior á media estatal, e aínda así temos cifras de precariedade e desemprego semellantes”, advertiu.
Segundo Sío, a reforma laboral de 2021 agravou este modelo ao xeneralizar a parcialidade e os contratos fixos-descontinuos. “Comprobamos como ao inicio do curso escolar se incorporan preto de 6.000 persoas ao ensino, pero durante o verán moitas estiveron no paro”, explicou.
Pola contra, moitas persoas traballadoras volven ao desemprego ao rematar contratos ligados á hostalaría e ao comercio. “Máis do 60 % da contratación indefinida é fixa-descontinua ou a tempo parcial. O pouco emprego que se crea é precario e con salarios baixos, ao non ser a tempo completo”, denunciou.
Déficit de persoal e deterioro nos servizos sociais
Sío tamén chamou a atención sobre a perda de máis de mil persoas afiliadas na sanidade e nos servizos sociais, un ámbito que xa sofre déficit de persoal. “Debería haber prazas residenciais para o 5 % da poboación maior de 65 anos, pero só existen para o 3 %, o que supón unha carencia do 40 %”, indicou.
O sindicalista lembrou as mobilizacións das traballadoras do sector dos coidados —residencias, centros de día e SAF—, que reclaman condicións laborais e salariais dignas. “As políticas de recortes e privatizacións da Xunta expulsan as traballadoras deste sector, que debería ser xerador de emprego estábel e digno”, sinalou.
Un cambio urxente de modelo económico e social
González Sío reclamou un cambio urxente no modelo produtivo galego, que fortaleza os sectores con emprego estábel e mellores condicións, fronte á crecente dependencia de actividades como a hostalaría ou o comercio. “Precisamos un modelo que garanta emprego digno e de calidade, non só cifras”, concluíu.