Meteogalicia amplía a súa web cunha nova sección de clima que ofrece datos meteorolóxicos desde o ano 2000
A directora xeral de Enerxías Renovables e Cambio Climático, Paula Uría, presentou hoxe os novos contidos dispoñibles na web de Meteogalicia, que inclúen unha nova sección de Clima que pon a disposición da cidadanía un resumo estatístico dos datos meteorolóxicos de Galicia desde o ano 2000.
Esta actualización busca mellorar a comunicación e o acceso á información meteorolóxica, permitindo á cidadanía interpretar de maneira sinxela os valores medios de distintos parámetros como a temperatura, a precipitación ou o vento en calquera mes do ano e en calquera punto con estación meteorolóxica. Ademais, tamén se poderá consultar se estes rexistros son os habituais ou se superan algún récord.
Ata o momento, a web de Meteogalicia permitía acceder a datos actualizados cada 10 minutos desde a súa rede de 160 estacións meteorolóxicas, xerando máis de 120 millóns de datos anuais. Con esta nova funcionalidade, incorpórase unha visión máis ampla e contextualizada das condicións climáticas ao longo dos anos.
Paula Uría destacou que o novo visor da web permitirá consultar datos meteorolóxicos e de calidade do aire, ademais de previsións en mapas de símbolos e modelos numéricos de maneira máis áxil e visual. A web de Meteogalicia, que recibe unha media de 20.000 visitas ao día e alcanza picos de ata 60.000, reforza así o seu papel como ferramenta clave para o seguimento do clima e a meteoroloxía en Galicia.