Multitudinaria protesta en Pontecesures contra o ERE anunciado por Nestlé
A localidade pontevedresa de Pontecesures acolleu este sábado unha multitudinaria manifestación en rexeitamento ao expediente de regulación de emprego impulsado por Nestlé, que afectará a 27 traballadores da planta galega da compañía, situada neste municipio.
A mobilización, convocada polos representantes dos traballadores, reuniu arredor de 1.500 persoas, segundo a organización, entre empregados, veciños, representantes sindicais doutras empresas e cargos políticos. A marcha percorreu as rúas da vila desde a Praza de Pontevedra ata as instalacións da fábrica, nunha protesta que o comité cualificou de “histórica” pola elevada participación.
Desde o comité de empresa amosaron o seu desacordo coa decisión adoptada pola multinacional e cuestionaron a necesidade dos despedimentos. Os representantes sindicais consideran que a medida terá un forte impacto social e económico na comarca, xa que supón aproximadamente o 14 % do persoal da planta de Pontecesures.
O ERE anunciado por Nestlé afectará tamén a outros centros de traballo da compañía en distintos puntos do Estado, cun máximo de 301 persoas afectadas, segundo trasladou a empresa.
Na actualidade continúan abertas as negociacións entre a dirección e os representantes dos traballadores. O período de consultas prolongarase ata o próximo 4 de xuño e os sindicatos agardan reducir o número de afectados e garantir condicións dignas para as posibles saídas.
Nestlé xustificou o expediente pola evolución do sector do gran consumo, o incremento dos custos operativos e os cambios nos hábitos de compra, factores que, segundo a empresa, obrigan a avanzar na automatización e dixitalización dos procesos produtivos.
Á protesta tamén asistiron diferentes representantes políticos, entre eles cargos do PSdeG, que expresaron o seu apoio ás reivindicacións do persoal e reclamaron unha maior implicación da Xunta de Galicia no conflito laboral.