Néstor Rego pide no Congreso un concerto económico para Galicia
O deputado do BNG no Congreso, Néstor Rego, defendeu no pleno unha iniciativa para que Galicia dispoña dun novo modelo de financiamento baseado no concerto económico, que permita á Administración Galega recadar e xestionar os seus propios impostos. Rego sostén que este sistema poría fin ao “espolio fiscal” que, ao seu xuízo, sofre o país e garantiría que a riqueza xerada en Galiza reverta directamente no benestar da maioría social.
Durante a súa intervención, o deputado destacou a importancia da condonación de 4.010 millóns de euros, incluída no Acordo de Investidura asinado polo BNG e aprobada recentemente polo Consello de Ministros e Ministras. Esa cifra, sinalou, representa “un de cada tres euros da débeda pública creada en Galiza pola mala xestión do PP”.
Rego criticou duramente que o Goberno galego rexeite aceptar esta condonación, xa que permitiría liberar recursos para políticas sociais, educación, sanidade, vivenda ou dependencia. Para o deputado, esta negativa evidencia que “o PP e Rueda antepoñen intereses partidistas aos de todo o pobo galego”.
Rego denunciou que o actual modelo estatal provoca “máis de 5.000 millóns de euros de diferenza entre o que paga Galiza e o que recibe”, segundo datos de 2022. Culpou tamén o efecto sede, polo que moitas empresas que operan en Galiza tributan fóra, así como o financiamento local insuficiente, que deixa aos concellos galegos “50 euros por habitante menos que a media estatal”.
Proposta do BNG: unha facenda propia
Fronte a este panorama, o BNG aposta por un modelo de concerto económico, similar ao existente noutros territorios, que permitiría:
- Recaudar todos os impostos xerados en Galiza.
- Ter plena capacidade normativa e de xestión fiscal.
- Dotarse dunha facenda propia que asegure xustiza, equidade e redistribución.
Rego rexeitou os argumentos que cuestionan a capacidade de Galiza para xestionar os seus recursos e concluíu: “España vive, en boa parte, tamén do espolio da Galiza”. Defendeu que a soberanía fiscal é unha ferramenta esencial para fortalecer os servizos públicos e garantir o benestar social.