O alcalde anima a participar no XXVI Foro Tecnolóxico de Emprego organizado coa Uvigo
O alcalde de Vigo, Abel Caballero, animou este martes ao alumnado a participar no XXVI Foro Tecnolóxico de Emprego, organizado pola Universidade de Vigo en colaboración co Concello.
As facultades de Enxeñería Industrial e de Minas acollerán os próximos 24 e 25 de febreiro esta nova edición dun evento que busca fomentar a relación directa entre estudantes e empresas, facilitando oportunidades de inserción laboral e contacto co tecido produtivo.
Caballero destacou que o foro propicia o encontro entre a “excelencia formativa” da cidade e os axentes sociais e empresariais. “O talento tecnolóxico de Vigo é excepcionalmente importante e fai que nestes momentos esteamos a abrir unha fábrica de microchips fotónicos e a decisión de INDRA de aumentar a súa posición en Vigo”, subliñou.
Durante a presentación, varios estudantes que forman parte da organización explicaron que o programa inclúe talleres formativos, mesas redondas coa participación de responsables de recursos humanos e profesorado, espazos expositivos de compañías e entrevistas rápidas entre empresas e alumnado, coñecidas como “speed recruiting”.
A organización anima tanto ao estudantado universitario como ao de formación profesional a participar nun foro que suma xa 26 edicións e que se consolidou como unha cita de referencia para impulsar a empregabilidade no ámbito tecnolóxico.