O BNG critica as medidas da Xunta pola guerra e acusa a Rueda de non apoiar os sectores máis afectados
O Bloque Nacionalista Galego (BNG) criticou o paquete de medidas aprobado pola Xunta para facer fronte ás consecuencias económicas da guerra en Oriente Medio, ao considerar que non ofrece solucións reais nin para a cidadanía nin para os sectores máis afectados.
A viceportavoz parlamentaria do BNG, Olalla Rodil, cualificou de “vergoñentas” as medidas do Goberno galego, asegurando que chegan “tarde, mal e arrastro” e que non supoñen un apoio efectivo ás persoas e actividades económicas prexudicadas polo contexto internacional.
Rodil sinalou que o plan carece de medidas excepcionais e baséase, na súa maior parte, en programas xa existentes, sen incorporar actuacións específicas para paliar o impacto da crise.
Neste sentido, denunciou a ausencia de apoio ao sector primario, tanto ao agrario como ao pesqueiro, que, segundo indicou, está a sufrir especialmente o incremento dos custos, especialmente no caso dos combustibles. “Hai mariñeiros aos que non lles compensa saír traballar polos custos”, advertiu.
A deputada nacionalista tamén criticou algunhas das propostas incluídas no plan, como a promoción de Galicia como destino turístico. Considerou “indecente” que, nun contexto de conflito bélico, se aposte por presentar a comunidade como “refuxio de tranquilidade” para atraer visitantes.
Ademais, o BNG contrapuxo a este plan a súa propia proposta, que inclúe medidas como axudas directas aos sectores máis afectados, o levantamento de peaxes nas autoestradas autonómicas ou o reforzo das prestacións sociais.
Rodil afirmou que o Goberno galego carece dun proxecto claro para afrontar os retos actuais e acusouno de basear a súa acción política na propaganda e na falta de respostas efectivas.
De cara ao Debate do Estado da Autonomía, o BNG avanzou que defenderá unha alternativa política centrada na protección das maiorías sociais e no impulso dun modelo económico máis xusto e sostible para Galicia.