O BNG critica o plan da Xunta pola guerra e contrapón os 157 M€ cos 900 M€ para a industria militar
O Bloque Nacionalista Galego (BNG) criticou o plan de axudas aprobado pola Xunta para facer fronte ás consecuencias da guerra en Oriente Próximo, ao considerar insuficiente a súa dotación de 157 millóns de euros.
O portavoz de Economía e Industria do BNG, Brais Ruanova, contrapuxo esta cifra cos 900 millóns de euros que, segundo indicou, o Goberno galego prevé mobilizar para a industria militar no marco da Iniciativa Estratéxica en Seguridade, Defensa e Aeroespazo 2025-2030.
Ruanova cualificou de “especialmente preocupante” a escasa contía destinada á protección social, con 6,2 millóns de euros para apoiar aos fogares vulnerables. Comparou esta cifra cos 105 millóns destinados polo Goberno vasco a este ámbito, subliñando a diferenza entre ambos modelos.
O deputado nacionalista tamén puxo o foco nos cinco millóns de euros previstos para a promoción turística de Galicia como “destino de tranquilidade”, cuestionando a prioridade desta medida fronte ás necesidades sociais e económicas derivadas do conflito.
No ámbito empresarial, criticou que o apoio se limite a 62 millóns de euros en préstamos, unha cantidade que considerou insuficiente en comparación con outros territorios. Así mesmo, sinalou a falta de axudas directas para sectores estratéxicos como o pesqueiro e o agrario, especialmente afectados polo incremento dos custos enerxéticos.
Ruanova apuntou que as medidas da Xunta céntranse en actuacións como a modernización de infraestruturas ou a compra de maquinaria, sen abordar problemas inmediatos como o custo dos combustibles.
Fronte a este escenario, o BNG propón un plan alternativo de 700 millóns de euros, que inclúe un “escudo social” para protexer ás familias ante a subida de prezos, con medidas como o reforzo das prestacións sociais, un bono de transporte ou a limitación do incremento de alugueiros.
Ademais, a proposta nacionalista contempla axudas directas ás empresas e sectores máis afectados, a eliminación de peaxes nas autoestradas autonómicas, así como medidas orientadas á autonomía enerxética e ao control de prezos.
O BNG tamén defende reforzar a colaboración cos concellos e mellorar o seu financiamento para garantir a prestación de servizos públicos básicos.