O BNG de Lugo propón encontros con alcaldes de Galicia de cara ás eleccións de 2027
O BNG de Lugo iniciou o seu traballo político con vistas ás eleccións municipais de 2027 coa celebración dun encontro no que participaron cargos institucionais da formación co obxectivo de compartir experiencias de alcaldías que deron o salto da oposición ao goberno. A cita buscou extraer aprendizaxes útiles que permitan reforzar a estratexia municipalista da organización nos vindeiros comicios.
A sesión estivo moderada polo portavoz do BNG e tenente de alcalde do Concello de Lugo, Rubén Arroxo, e contou coa intervención de Xosé Antonio Pérez, alcalde de Verea; Ana Ermida, alcaldesa de Barreiros; e Xosé Lois Vilariño, alcalde da Pobra do Brollón. Durante o encontro abordáronse diferentes experiencias de xestión municipal e analizáronse as claves que permitiron consolidar proxectos de goberno en distintos concellos de Galicia.
O debate centrouse na identificación de boas prácticas, na definición de dinámicas de traballo eficaces e nas fórmulas para construír alternativas sólidas nos ámbitos locais. Entre as ideas que vertebraron a xornada destacou a necesidade de elaborar o proxecto político desde a escoita activa e a proximidade coa veciñanza, así como a importancia de articular unha narrativa propia en cada municipio e de fortalecer o traballo en rede do BNG nos concellos de Galicia.
A formación enmarca este tipo de encontros nun proceso de preparación anticipada de cara ás municipais de 2027, co obxectivo de ampliar a súa presenza institucional e consolidar opcións de goberno en máis localidades.