O BNG defende no 1º de Maio “paz e dereitos” fronte ás políticas neoliberais e belicistas
O Bloque Nacionalista Galego sumouse este mércores ás mobilizacións do Día Internacional da Clase Traballadora, reivindicando “emprego digno, dereitos e paz” fronte ao aumento do gasto militar e a falta de avances nos dereitos sociais e laborais. O deputado do BNG no Congreso, Néstor Rego, participou na manifestación convocada pola CIG en Vigo, acompañado por cargos da formación como Xabier Pérez Igrexas ou Alexandra Fernández, entre outros.
Rego denunciou que “vivimos un momento de crise sistémica, onde o capital intensifica a súa ofensiva contra as maiorías sociais e promove unha perigosa escalada militarista impulsada polos Estados Unidos e avalada pola Unión Europea”.
Segundo o deputado nacionalista, “os Estados membros da OTAN, entre eles o español, asumen como propia unha estratexia de guerra, recortando recursos destinados á sanidade, educación ou pensións para aumentar o gasto militar”.
Rego lembrou que o BNG xa ten rexistrado no Congreso unha proposición de lei para reducir a xornada laboral a 35 horas semanais, que considera un paso necesario cara unha futura xornada de 32 horas. “Non pode quedar nun anuncio cosmético: debe representar un avance real na conciliación e nos dereitos laborais”, subliñou.
Tamén cargou contra o Goberno galego do PP, ao que acusou de “destruir emprego, desmantelar servizos públicos e permitir o espolio dos recursos naturais sen beneficio para o país”.
“Galiza precisa soberanía para garantir traballo e futuro”
O deputado do BNG defendeu que a solución pasa por “construír un modelo económico xusto, con servizos públicos fortes, e que permita vivir dignamente na nosa terra”.
Neste sentido, destacou que “a desertización industrial, o abandono rural e a emigración xuvenil son consecuencias directas dun modelo económico imposto desde Madrid e Bruxelas, que trata a Galiza como unha colonia”.
Contra a guerra e a favor da soberanía dos pobos
Rego tamén criticou o papel da UE e do Estado español, aos que acusou de estar cada vez máis sometidos aos intereses “do complexo militar-industrial dos EUA”.
“Necesitamos un novo marco de relacións internacionais baseado na cooperación e na paz. Neste 1º de maio, o BNG ergue a súa voz por unha Galiza con traballo, con dereitos e sen guerras”, concluíu.