O BNG denuncia a falta de diálogo e recursos no novo Plan de Dependencia e Discapacidade da Xunta
O BNG denunciou que o novo Plan de Dependencia e Discapacidade da Xunta de Galicia, aprobado sen diálogo previo co sector nin cos profesionais, carece dos recursos necesarios para garantir a atención digna ás persoas con dependencia ou discapacidade. A portavoz de Política Social do BNG, Olalla Rodil, criticou a decisión do goberno galego de reformar normativas fundamentais a través da Lei de Acompañamento aos Orzamentos, sen contar co Consello Galego de Benestar nin cos traballadores sociais municipais, que só recibiron información a través da plataforma web MATIASS unha vez que a nova normativa xa estaba en vigor.
Un dos cambios máis relevantes do plan é a unificación da solicitude de discapacidade e dependencia, o que implica a creación de novos procedementos de tramitación e a eliminación do informe social preceptivo. Rodil alertou de que estas reformas, presentadas pola Xunta como un proceso de simplificación administrativa, poden empeorar a calidade das valoracións e aumentar a indefensión das persoas solicitantes.
Segundo datos oficiais, entre 2017 e 2023 faleceron máis de 6.500 persoas en Galicia á espera de recibir unha prestación recoñecida por lei. Rodil denunciou que a Xunta non contratou persoal adicional para xestionar este aumento da demanda e que, en cambio, optou por establecer incentivos á produtividade para os traballadores, co obxectivo de aumentar o número de expedientes tramitados. “Non se trata só de xestionar solicitudes, senón de garantir o acceso real aos recursos e servizos”, reclamou.
Outro problema detectado é que as novas resolucións non inclúen a valoración de mobilidade, o que impide que moitas persoas accedan á tarxeta azul de aparcamento, obrigándoas a presentar reclamacións para exercer un dereito básico. “Por que non se tramita todo conxuntamente? Por que non escoitan a ninguén?”, preguntou Rodil, cualificando a xestión do PP de “apisonadora propagandística que deixa a xente polo medio”.
A deputada lembrou que en 2021 Feijóo anunciou un plan de choque en dependencia, que resultou ser ineficaz, xa que os tempos de tramitación aumentaron de 372 días en 2021 a 387 días en 2024.
O modelo do BNG
Rodil reivindicou a creación dunha rede pública de coidados que garanta o benestar das persoas con dependencia ou discapacidade a través de servizos públicos, fronte ao modelo do PP, que se basea nunha prestación económica de 416 euros ao mes para quen coide de familiares. Para o BNG, esta estratexia precariza e privatiza os coidados, cando a Lei de Dependencia establece que a asistencia familiar debe ser unha opción excepcional.
A deputada concluíu denunciando que, dos 90 millóns de euros anunciados para o novo Plan de Dependencia e Discapacidade, o único gasto extra da Xunta sexa o financiamento destas axudas individuais, sen un investimento real en servizos públicos de atención.