O BNG denuncia fallos na xestión das listas de substitución docente pola Xunta
A deputada do Bloque Nacionalista Galego (BNG), Iria Taibo, denunciou no Parlamento a xestión das listas de substitución docente por parte da Consellería de Educación, que, segundo afirmou, está a provocar a falta de profesorado en diversas especialidades.
Taibo cualificou a situación de “grave incompetencia” e asegurou que existen materias como latín, grego, edificación, música ou portugués que levan meses sen persoal substituto para cubrir vacantes.
A deputada sinalou que, máis aló das dificultades para atopar profesionais con formación específica, a Administración autonómica pode adoptar medidas para mellorar a captación de profesorado, comezando por mellorar as condicións laborais do persoal interino.
Como exemplo, explicou que no caso de latín e grego, a Consellería iniciou un procedemento en outubro que aínda non foi resolto, o que impide dispoñer de profesorado substituto nestas especialidades.
Un dos puntos centrais da crítica centrouse na situación do portugués nas escolas oficiais de idiomas. Segundo indicou, existe un grupo de titulados en Tradución e Interpretación con portugués como segunda lingua estranxeira que non pode acceder ás listas debido a unha orde da Consellería que non se adapta á realidade actual.
Taibo advertiu que esta limitación non se produce noutras linguas como ruso, chinés ou xaponés, onde si se permite o acceso con segunda lingua estranxeira, o que, ao seu xuízo, evidencia un erro na normativa e un descoñecemento do sistema educativo.
A deputada concluíu reclamando cambios na xestión das listas e unha revisión das condicións de acceso para garantir a cobertura das prazas e o correcto funcionamento do sistema educativo.