O BNG esixe frear os bloqueos de webs por parte de LaLiga e Movistar tras afectar a servizos esenciais
O Bloque Nacionalista Galego (BNG) anunciou que volverá rexistrar iniciativas no Congreso para esixir ao Goberno do Estado que actúe ante os bloqueos indiscriminados de páxinas web atribuídos a LaLiga e Movistar.
O deputado do BNG, Néstor Rego, advertiu de que a situación deu un “salto cualitativo” nas últimas semanas, ao afectar non só a webs comerciais ou culturais, senón tamén a servizos dixitais considerados esenciais.
Entre os casos sinalados, destacou a afectación a ferramentas de xeolocalización empregadas para o seguimento de persoas vulnerábeis, como maiores, persoas dependentes ou menores, o que supón, segundo indicou, un risco para a súa seguridade.
Rego criticou o que cualificou como “uso desproporcionado e tecnicamente deficiente” das medidas de bloqueo, que están a prexudicar a miles de proxectos lexítimos alleos a actividades ilícitas.
Neste sentido, denunciou que intereses privados estean a prevalecer sobre dereitos fundamentais e sobre a continuidade de servizos básicos, sen un control efectivo por parte das administracións públicas.
O BNG considera inaceptábel que, baixo a loita contra a pirataría, se permita o bloqueo masivo de IPs compartidas, o que provoca consecuencias graves para terceiros e para servizos sociais sensibles.
A formación nacionalista propón reforzar as garantías legais, impedir o bloqueo de IPs completas e establecer mecanismos específicos de protección para servizos esenciais, así como protocolos de avaliación previa que eviten danos a terceiros.
Finalmente, Rego instou ao Goberno a revisar o marco normativo para garantir que a protección da propiedade intelectual non se realice en detrimento doutros dereitos fundamentais nin da prestación de servizos dixitais básicos.