Actualidade

O BNG condenou o ataque incendiario de Monforte e reclamou ao Goberno galego actuar con decencia, dignidade e responsabilidade, reforzando o sistema de acollida da infancia migrante.

A responsable de Infancia do BNG, Ariadna Fernández, condenou “firmemente” o acto vandálico contra o edificio da asociación Prodeme en Monforte, designado pola Xunta para acoller a menores migrantes, e pediulle ao presidente Alfonso Rueda que abandone “os discursos de odio” e deixe de empregar ás crianzas e adolescentes migrantes como arma nas súas disputas políticas co Goberno do Estado.

Fernández instou ao Executivo autonómico a desterrar termos como “guetos” ou “menas” e a non desumanizar a quen chega só na procura dun futuro mellor. “Son nenos e nenas que merecen ser acollidos, igual que o fixemos as galegas e galegos noutros tempos”, sinalou. Tamén reclamou ao PP que actúe “con decencia, dignidade e responsabilidade”, reforzando o sistema de protección, que cualificou de “infrafinanciado e infradotado”.

A concentración convocada polo BNG en Monforte supuxo a primeira resposta pública tras o ataque incendiario da madrugada, no que se lanzaron dous artefactos contra o inmoble. O centro estaba previsto como o primeiro recurso específico en Galicia para acoller a menores migrantes derivados polo Goberno central, ata agora atendidos no sistema ordinario de protección.

Pola súa banda, o deputado Iago Suárez destacou o carácter “histórico” da mobilización como resposta do pobo galego e, en particular, do sur de Lugo, ante “un dos ataques fascistas máis significativos dos últimos tempos”. Reivindicou que Galicia é un pobo acolledor e advertiu de que responderá “todas as veces que faga falta para frear o odio, o racismo e o fascismo”.