O BNG presenta a campaña do 8M baixo o lema ‘Nin medo, nin vergoña’ reivindicando o feminismo combativo e antifascista

Pontón: “Fronte ao rearme do machismo e do neofascismo, só hai unha resposta posible: máis feminismo, máis mobilización e máis unión das mulleres”
Nin medo nin vergona
8 Mar 2025

O BNG presentou a campaña do 8 de marzo baixo o lema "Nin medo, nin vergoña", unha mensaxe que reivindica o feminismo combativo, rebelde e antifascista fronte á onda reaccionaria e machista que está avanzando a nivel global.

A portavoz nacional, Ana Pontón, xunto á responsable de Acción Feminista, Noa Presas, e á ilustradora Lúa Mosquetera, autora da imaxe da campaña, destacaron que este 8M debe ser unha resposta firme ante os ataques contra os dereitos das mulleres.

"Fronte ao rearme do machismo e do neofascismo en todo o mundo, nin medo, nin vergoña, senón orgullosamente feministas para defender os dereitos das mulleres e a igualdade real", afirmou Pontón.

A líder nacionalista subliñou que a ofensiva da extrema dereita está cuestionando dereitos que parecían consolidados, como o acceso ao aborto ou a igualdade salarial.

"A todos os Trump, Musks, Abascales, Mileis, Orbáns… a todos os que queren devolvernos ao pasado, este 8M temos algo que dicir: nin medo, nin vergoña", sentenciou Pontón.

O perigo da reacción machista e a necesidade de máis feminismo

Pontón advertiu que a extrema dereita pretende rebaixar as expectativas das mulleres, consolidar as desigualdades salariais e perpetuar os roles tradicionais de xénero.

"Queren que as mulleres sigamos sendo as eternas coidadoras, sen que as institucións asuman as súas responsabilidades", explicou, denunciando que a Xunta do PP está privatizando os servizos de atención ás vítimas de violencia machista.

Para o BNG, a única resposta posible a este ataque contra os dereitos das mulleres é máis feminismo, máis mobilización e máis unión.

Pontón tamén denunciou que, mentres persisten problemas como a violencia de xénero, a brecha salarial ou a feminización da pobreza, hai quen intenta desprestixiar o feminismo con frases como "están indo demasiado lonxe".

"Como imos ir demasiado lonxe cando a violencia machista segue matando? Como imos ir demasiado lonxe cando as mulleres seguimos cobrando menos que os homes? Como imos ir demasiado lonxe cando a cara da pobreza segue sendo a dunha muller?"

Resposta á campaña de bulos do PP

Ana Pontón rexeitou as críticas do PP, que nos últimos días tentou difundir ataques contra ela e o BNG en relación cun cartaz feminista.

"O Partido Popular non quere entender o que xa dixen: ás mulleres en política hai que criticarnos polas nosas actuacións políticas, non por calquera outra consideración", afirmou.

Pontón insistiu en que o PP está máis preocupado en atacar ao BNG que en propoñer medidas reais para a igualdade, e acusouno de "importarlle un bledo" os dereitos das mulleres.

"No canto de facer propostas en positivo para as mulleres neste 8M, o único que fan é montar un bulo contra a portavoz do BNG", denunciou.

Un feminismo forte e mobilizado para frear o retroceso

A ilustradora Lúa Mosquetera explicou que a imaxe da campaña inclúe unha esvástica tachada, símbolo das forzas reaccionarias que promoven o retroceso nos dereitos das mulleres.

"Estamos nun momento no que o neofascismo quere infundir medo e acovardar ás mulleres. O feminismo ten que responder con forza", asegurou.

Pola súa parte, Noa Presas destacou que o BNG aposta por un feminismo mobilizador e antifascista, ante un contexto no que os dereitos das mulleres están en perigo.

"Sempre que o feminismo estivo ameazado, respondeu con máis forza. E así será este 8M en Galicia, en Europa e no mundo", concluíu.

⚙ Configurar cookies
0.11275291442871