Actualidade

Néstor Rego demanda a substitución dos buques con amianto por patrulleiras modernas e a reparación do helicóptero con base en Vigo, alertando da inoperatividade de varios medios e dos riscos para o persoal.

O Bloque Nacionalista Galego vén de rexistrar unha iniciativa no Congreso para esixir ao Goberno do Estado actuacións inmediatas ante as graves deficiencias que afectan ás bases galegas do Servizo de Vixilancia Aduaneira (SVA), en especial nas de Ribadeo, Muros e Vigo. O deputado Néstor Rego alerta da presenza de amianto nos buques “Alcaraván II” e “VA II” e denuncia que o helicóptero con base en Vigo leva máis de cinco meses fóra de servizo.

Rego considera inadmisíbel que se pretenda substituír os barcos contaminados por outros con máis de 40 anos de antigüidade, e esixe medios seguros e modernos para garantir a operatividade do servizo. Tamén solicita a avaliación de todos os buques construídos antes de 2002 e a vixilancia da saúde do persoal embarcado.

Ademais, o deputado nacionalista reclama a reparación inmediata do helicóptero baseado en Vigo, esencial para o control aéreo da costa galega e da cornixa cantábrica, e que se dote de medios materiais e humanos adecuados ás bases galegas do SVA.