O botulismo aviar foi a causa da morte de parrulos reais na lagoa da Congorza
Un estudo realizado por persoal investigador do Instituto Español de Oceanografía (IEO, CSIC) xunto con investigadores do Instituto de Investigacións Mariñas (IIM-CSIC) e da Consellería de Medio Ambiente e Cambio Climático da Xunta de Galicia permitiu esclarecer as causas dos episodios de mortalidade de parrulos reais (Anas platyrhynchos) rexistrados durante os veráns de 2024 e 2025 na lagoa costeira da Congorza, situada en Punta Balea (Cangas do Morrazo, Pontevedra).
A investigación, publicada na revista Environmental Science and Pollution Research, confirma que as análises realizadas nos cadáveres dos parrulos indican que a principal causa da mortalidade foi o botulismo aviar, asociado á presenza de toxinas tipo C e C/D producidas por Clostridium botulinum.
“O predominio das lentellas de auga e as recorrentes proliferacións de euglenofíceas evidencian a eutrofización e grave degradación do hábitat, que potencialmente contribúen a un estrés multifactorial no caso dos parrulos reais”, sinala Francisco Rodríguez, investigador do Centro Oceanográfico de Vigo do IEO e primeiro autor do estudo.
Durante o verán de 2024 rexistráronse mortalidades masivas de parrulos reais na lagoa costeira da Congorza; por iso analizáronse a auga, os tecidos e as larvas atopadas nos exemplares mortos para avaliar as súas características fisicoquímicas, a composición do plancto, os signos clínicos e as toxinas, co fin de explicar esta mortalidade.
Durante o verán de 2025 detectáronse parámetros de calidade da auga deficientes, con niveis subóxicos de osíxeno disolto e altos niveis de demanda biolóxica e química de osíxeno, confirmando unha grave degradación ambiental e o incumprimento da Directiva Europea de Tratamento de Augas Residuais Urbanas (UE/2024/3019).