O CAAN de Meis consolídase como referencia tras 620 adopcións e novos investimentos da Deputación
O presidente da Deputación de Pontevedra, Luis López, destacou o papel do Centro de Acollida e Protección de Animais (CAAN) de Meis como unha “referencia en España” tras rexistrar 620 adopcións entre 2025 e o que vai de 2026.
Durante unha visita ás instalacións da Armenteira, o mandatario provincial anunciou un novo investimento de 20.000 euros destinado á mellora dos quirófanos, co obxectivo de reforzar o servizo de control de colonias felinas que a Deputación puxo en marcha hai menos de dous anos.
Este programa permitiu atender xa a preto de 1.800 gatos e dá servizo a 40 concellos de menos de 20.000 habitantes, axudando ás administracións locais a cumprir coa lei de Benestar Animal. As actuacións inclúen a identificación, esterilización, vacinación e desparasitación dos animais.
O investimento permitirá adquirir novo material cirúrxico, un equipo de análise de sangue, equipamentos de tratamento e unha mesa de cirurxía, mellorando así a seguridade e a calidade da atención.
Ademais deste servizo, o CAAN continúa a ser un referente no rescate e coidado de animais abandonados. Nos últimos meses, xestionáronse 2.150 avisos de recollida, recuperáronse máis de 1.300 animais e devolvéronse 650 aos seus donos.
O centro presenta unha taxa de adopción do 70 %, cun tempo medio de estancia de 80 días, o máis baixo ata o momento. Na actualidade, permanecen nas instalacións 180 cans, dos cales 54 son cachorros, á espera de atopar unha familia.
A Deputación ten en marcha tamén unha campaña de 30.000 euros para fomentar as adopcións, destacando os beneficios da convivencia con animais, como a mellora da saúde física, o benestar emocional e o fomento das relacións sociais.
Segundo destacou Luis López, o CAAN recibe máis de 1 millón de euros anuais e esperta o interese doutras institucións e concellos de fóra da provincia, que ven neste modelo un exemplo a seguir.