O Catálogo de Recursos Naturais de Galicia incorpora 65 novos produtos minerais nunha xornada celebrada en Ferrol

O Catálogo de Recursos Naturais de Galicia incorpora 65 novos produtos minerais, que contan con ficha técnica propia, nunha actualización presentada este venres no CIS Ferrol. O inventario alcanza así os 190 materiais documentados, dos que 36 das novas incorporacións contan tamén con mostras físicas dispoñibles para a súa consulta.
A xornada celebrada en Ferrol serviu para dar a coñecer os novos elementos incorporados ao catálogo, entre os que figuran materiais como a mica, o magal ou a lousa rectangular verde. A iniciativa permite ampliar o coñecemento sobre os recursos minerais dispoñibles en Galicia e as súas posibles aplicacións industriais.
O traballo de actualización tamén incluíu a análise de novos usos para produtos e subprodutos minerais galegos, a revisión do mapa de recursos e a incorporación dunha sección específica dedicada aos minerais estratéxicos.
O catálogo pode consultarse na Materioteca de Galicia, un espazo de difusión, exposición e arquivo de materiais innovadores e sostibles situado no CIS Ferrol. Este centro reúne información e mostras de diferentes recursos co obxectivo de facilitar o seu coñecemento e explorar as súas posibilidades de aplicación.
A actualización do inventario busca contribuír ao aproveitamento dos recursos minerais galegos, favorecer novas oportunidades para a industria e reforzar o coñecemento sobre os materiais dispoñibles no territorio.