O Cidade de Lugo Fluvial e o Club Deportivo Delikia dominan as Copas do Rei e da Raíña de tríatlon en Águilas
O tríatlon galego foi protagonista absoluto no XL Tríatlon Marqués de Águilas, onde o Club Deportivo Delikia feminino e o Cidade de Lugo Fluvial masculino proclamáronse vencedores da Copa da Raíña Iberdrola e da Copa do Rei Suzuki de tríatlon, respectivamente, converténdose ademais nos primeiros líderes da Liga Iberdrola e da Liga Suzuki de tríatlon 2026.
Na proba feminina, o conxunto do Club Deportivo Delikia, formado por deportistas como Andrea Trigo, Natalia Castro, Xisca Tous, Lucía Piñón, Carla Larrabeiti e Gabriela Quintas, impúxose cun tempo de 1:03:14 nunha carreira moi igualada, por diante do Náutico de Narón e do Katoa Barcelona. Pola súa parte, o Cidade de Lugo Fluvial volveu subir ao máis alto do podio na categoría masculina cun rexistro de 55:48, nunha competición na que superou por escaso marxe ao CEA Bétera e ao Peñota Dental Triatlón.
A fin de semana tamén deixou bos resultados nas Copas Federación e no Campionato de España de Tríatlon CRE Talentos, onde equipos do Cidade de Lugo Fluvial sumaron novos podios, e destacaron o Náutico de Narón feminino e o Tribarros Villafranca masculino como gañadores das probas de talentos.
A competición continuou cos Campionatos de España de Tríatlon por Relevos, nos que o Cidade de Lugo Fluvial asinou outro triunfo na proba masculina cun final moi axustado, mentres que o Náutico de Narón venceu na categoría feminina. En relevos de talentos, o Club Deportivo Delikia logrou tamén a vitoria masculina, pechando unha fin de semana de dominio galego no tríatlon nacional.
No ámbito internacional, a selección española proclamouse campioa na proba de relevo mixto da Copa do Mundo de Chengdú, en China, cun papel destacado dos galegos Sara Guerrero, do Náutico de Narón, e Antonio Serrat, do Cidade de Lugo Fluvial, este último clave na remontada final que deu o ouro a España. Na proba individual, Guerrero foi cuarta e Serrat sexto, mentres que Esteban Basanta completou a súa participación cunha vixésimo cuarta posición.