O Club Halterofilia Cambre gaña o V Trofeo Internacional Ferenc Szabó
O Club Halterofilia Cambre proclamouse vencedor por equipos do V Trofeo Internacional Ferenc Szabó, celebrado no polideportivo municipal dos Rosales, na Coruña. A competición reuniu representantes de clubs e seleccións de España e doutros países europeos na categoría sub-23.
O equipo de Cambre estivo formado por Eduarda Souza, coñecida como 'Duda', Ane Rodríguez, Paula Fernández e Asier Blanco. A formación impúxose na clasificación colectiva por diante do Club Halterofilia Coruña e de Alemaña.
Na categoría feminina, Duda acadou o primeiro posto e mantivo a súa condición de vencedora nas cinco edicións celebradas ata o momento. A súa compañeira Ane Rodríguez completou o podio cun terceiro posto, mentres que Digna Silo, do club coruñés, foi segunda.
Na competición masculina, Asier Blanco rematou en cuarta posición. O triunfo foi para Tiago Larramendi, do Club Halterofilia Coruña, seguido de Seb Lawton, de Gran Bretaña, e Lukestefan Micaleff, de Malta.
O programa incluíu tamén pola mañá o Critérium de Promesas Ferenc Szabó, no que participaron 50 deportistas de base repartidos nas categorías sub-15 e sub-17, tanto masculina como feminina. Entre os representantes do club de Cambre destacaron Ian Rodríguez Couso, de só dez anos e o participante máis novo do torneo, e Martín Lojo Novo, polo seu traballo técnico.