O Club Náutico Folixa destaca a nivel internacional con grandes resultados en Francia
O Club Náutico Folixa das Pontes regresou de Francia cunha destacada participación en dúas competicións internacionais e con varios resultados deportivos de relevancia. A entidade estivo presente no IBCPC Participatory Dragon Boat Festival, celebrado en Aix-les-Bains, e no Open Internacional de Waveski Surfing de Lacanau.
No festival de Dragon Boat, o club pontés participou xunto a mulleres superviventes de cancro de mama procedentes de diferentes países. A súa representación integrouse no Mollitiam, unha embarcación formada por sete equipos de toda España, que conseguiu situarse como o décimo mellor equipo entre 156 participantes de todo o mundo na proba dos 200 metros. Nos 1.000 metros, a embarcación acadou a 31ª posición.
A participación tamén estivo marcada por varios momentos de especial emoción. A pontesa Raquel Calvo foi a encargada de portar a bandeira durante a cerimonia de apertura, mentres que Tania Casal tomou parte na Cerimonia das Flores, un acto dedicado a lembrar e homenaxear as compañeiras falecidas.
A presenza do Club Náutico Folixa en Francia completouse coa participación de Gus Presa no Open Internacional de Waveski Surfing, disputado en Lacanau entre o 28 e o 30 de agosto. O deportista acadou a terceira posición na súa semifinal da categoría Máster e finalizou na quinta posición da súa categoría.
Máis alá dos resultados deportivos, o club destacou o valor dunha experiencia que permitiu aos seus integrantes compartir competición e vivencias con deportistas chegados de diferentes lugares do mundo. A entidade reivindica así o orgullo de representar as Pontes e Galicia en eventos deportivos internacionais e de contribuír á proxección do municipio máis alá das súas fronteiras.