O Colectivo RPM ten xa as artistas seleccionadas para as Residencias Paraíso 2025
O programa de residencias artísticas para a danza e as artes vivas pioneiro en Galicia contará na súa 9ª edición con Antón Yanguas, Euyín Eugene, Isabel do Diego, Natalia Fernandes & Marta Azparren, Suevia Rojo, Rocío Bello & Javier Hernando, Bal Castro e Isolda Comesaña como ‘Artistas Paraíso 2025’.
As residencias desenvolveranse entre abril e novembro en oito espazos repartidos por toda Galicia: o Vello Cárcere de Lugo, o Pazo da Cultura de Carballo, a Cidade da Cultura e o Salón Teatro do Centro Dramático Galego en Compostela, a Igrexa da Madalena de Ribadavia, a Casa da Cultura de Vimianzo, a Casa da Cultura de Corcubión e o Pazo da Cultura de Narón.
O proxecto, impulsado polo Colectivo RPM e financiado pola Xunta de Galicia a través da Axencia Galega das Industrias Culturais, conta coa colaboración de diversas institucións culturais locais. Cada residencia terá unha duración de 2 ou 3 semanas e unha dotación económica de entre 1.500 e 3.000 €.
As propostas seleccionadas abordan temas como a exposición pública do corpo, a disforia de xénero, a crise da vivenda ou o desexo como motor escénico, reflectindo as preocupacións e intereses das creadoras contemporáneas.