Actualidade

O Concello desenvolve dúas campañas para fomentar a reciclaxe: unha en 75 comunidades de veciños e outra na canle HORECA, promovendo a separación correcta dos residuos orgánicos e outros materiais.

O Concello ten en marcha dúas campañas para fomentar a separación de residuos, unha dirixida aos fogares e outra destinada ao sector HORECA (hoteis, restaurantes e cafeterías). O alcalde destacou que a correcta separación do orgánico e do resto de materiais reciclables é clave para avanzar na “economía circular, que é a conservación do planeta”.

A campaña para fogares abrangue 75 comunidades de veciños da cidade e busca promover o uso do contedor marrón, resolvendo as dúbidas sobre como separar adecuadamente o orgánico. Cada vivenda recibe un kit con materiais prácticos: recipiente para reciclar aceite, contedor individual para residuos orgánicos, díptico informativo e imán con recordatorios. Ademais, as comunidades reciben unha charla informativa durante a súa xunta de propietarios.

Pola súa banda, a campaña no sector HORECA consiste en visitas divulgativas personalizadas a máis de 800 establecementos, nas que se asesora ao persoal de cociña e ás xerencias sobre a separación de residuos orgánicos, aceites usados, café, vidro e envases lixeiros, entre outros.