O Concello inicia o proxecto das ramplas mecánicas entre Praza de España e Praza de América
O Concello de Vigo inicia o proxecto das ramplas mecánicas que unirán Praza de España e Praza de América. Así o anunciou o alcalde, Abel Caballero, quen explicou que o goberno municipal xa conta cos permisos necesarios para acometer os dous primeiros tramos das obras.
Trátase dos treitos comprendidos entre as rúas Gerona e Tarragona, e entre Tarragona e Islas Baleares. Segundo detallou o rexedor, a Xunta de Goberno aprobará a próxima semana o proxecto do primeiro tramo, entre Gerona e Tarragona, que contará cun orzamento de 8 millóns de euros financiados con Fondos FEDER.
O Concello continuará tamén co tramo entre as rúas Tarragona e Islas Baleares, para o que xa dispón da autorización da Xunta de Galicia. Caballero indicou que o goberno local está en disposición de iniciar estes dous treitos dunha obra que cualificou de “histórica”, xa que se vai tramitar unha modificación de crédito que permitirá poñelos en marcha de inmediato. O custo conxunto destas dúas fases ascende a 16 millóns de euros.
O alcalde avanzou que, unha vez aprobados os proxectos, iniciarase de forma consecutiva a licitación, a contratación e a execución das obras, de xeito que os dous primeiros tramos estarán en fase de obra este mesmo ano.
Caballero destacou que este corredor mecánico supón “a gran revolución da mobilidade” na cidade, cun itinerario que conectará Praza de América e Praza de España e que alcanzará un investimento total de 26 millóns de euros, incluíndo actuacións complementarias na contorna da Gran Vía e da Salgueira. “Será un gran corredor que conectará simbolicamente Coia con Príncipe”, subliñou.
Finalmente, o rexedor criticou á Xunta de Galicia polo tempo empregado en outorgar a autorización do tramo entre Gerona e Tarragona, asegurando que tardou cinco meses, fronte aos dous días nos que o Concello emitiu o seu informe correspondente.