O Concello organiza un ciclo de cine ao aire libre nos xardíns do Pazo de Castrelos
Os xardíns do Pazo de Castrelos converteranse en sala de cine ao aire libre durante os venres e sábados do 22 de agosto ao 6 de setembro, cun ciclo de proxeccións programado polo Concello baixo o título “Era unha vez nunha mansión británica...”.
As películas proxectaranse ás 22:00 horas, con entrada libre ata completar aforo. Cada sesión contará con 200 cadeiras para o público, que tamén poderá seguir as proxeccións sentado na herba ou de pé nas inmediacións.
O alcalde presentou hoxe a iniciativa xunto aos concelleiros de Cultura, Gorka Gómez, e de Turismo, María Lago, destacando que este ciclo se organiza con motivo do centenario da doazón do pazo á cidade.
“Queremos que a cidade se familiarice, aínda máis, con Castrelos e especialmente cos seus xardíns e o pazo”, explicou Abel Caballero, quen incidiu en que os obxectivos principais son promocionar a cultura cinematográfica, ofrecer unha experiencia de cinema ao aire libre e poñer en valor espazos da cidade menos coñecidos.
Venres 22 de agosto: “Corgi: as mascotas da raíña”. Animación. Todos os públicos.
Sábado 23 de agosto: “Emma”. Comedia. Maiores de 12 anos.
Venres 29 de agosto: “O xardín secreto”. Fantástico. Todos os públicos.
Sábado 30 de agosto: “Puñais polas costas”. Thriller. Maiores de 16 anos.
Venres 5 de setembro: “Misterio en Venecia”. Thriller. Maiores de 12 anos.
Sábado 6 de setembro: “Antes de nós”. Biografía de Castelao.