Actualidade

O Congreso avala a proposta do BNG para a cesión de terreos en desuso do Porto de Marín e da Escola Naval, co obxectivo de ampliar zonas verdes e espazos públicos para a veciñanza

O deputado do BNG no Congreso, Néstor Rego, conseguiu a aprobación dunha iniciativa na Comisión de Defensa destinada a impulsar o proxecto “Abrir Marín ao mar”. A proposta insta ao Goberno do Estado a ceder ao concello os espazos en desuso do Porto de Marín e os terreos infrautilizados na contorna da Escola Naval Militar, co fin de ampliar zonas verdes e novos espazos de uso público para a cidadanía.

Rego defendeu que Marín continúa “fechada ao mar” debido aos valados do porto e da Escola Naval, quedando só dous puntos de acceso ao litoral. A apertura destes espazos, sinalou, permitiría recuperar o vínculo histórico da vila co mar e “mellorar a calidade de vida da xente”, ao tempo que non prexudicaría nin ao funcionamento portuario nin á actividade da Escola Naval, pois só se solicitarían áreas “prescindíbeis ou infrautilizadas”.

A iniciativa saíu adiante malia a abstención do PP e do PSOE. O texto reclama ao Goberno iniciar a cesión de terreos de Portos do Estado e da Escola Naval para destinalos a espazos verdes, zonas de esparecemento e novos accesos ao litoral.

Entre as actuacións previstas inclúese a cesión gratuíta, mediante convenio, de espazos como o Paseo da Avenida de Ourense, o edificio de servizos e a pista deportiva, o Parque de Cantodarea, o paso inferior e accesos á zona suroeste do porto, o dique de embarcacións menores e o Paseo Alcalde Blanco. Tamén se propón incorporar ao expediente a dársena de embarcacións menores, a parcela da antiga nave de Pérez Torres, o edificio da cafetería do Paseo Alcalde Blanco e o inmoble da Avenida de Ourense nº 86, que se destinaría a centro social.

O acordo recolle ademais que as edificacións de oficinas e almacéns do antigo Peirao da Ribeira, incluído o edificio de Satlink unha vez finalizada a concesión, pasen a titularidade municipal.

No relativo á Escola Naval, a proposta aprobada reclama ao Ministerio de Defensa a cesión gratuíta e permanente do terreo da pista de atletismo, xunto ao retranqueo do muro perimetral ata as inmediacións do Edificio de Aulas, onde se sitúa a Torre do Reloxo. O obxectivo é permitir novas zonas verdes, abrir instalacións ao uso público civil, habilitar espazos náuticos deportivos para clubs locais e crear un Museo Municipal.

Rego subliñou que “o Congreso falou” e que o Goberno “non se pode volver negar” á cesión destes espazos fundamentais para conectar Marín co mar e poñer en valor a súa esencia mariñeira.